الزومة عروس النيل السر عثمان الطيب العيد الستينى

 الزومة عروس النيل... السر عثمان الطيب 

----------------------------------
الزومة ما ضايقي وقط ماها منضايقي 
..الزومة مبسوطة ستين ألف قيراط وزايدي إنبساط في بساط
..وفوق عز وهاط ووهاط ..ما طنطنت ناقي .. فايقي وعديل رايقي 
...وخلفت كراع فوق راي ما فلهمة ..
دة فهم وللقرقراب طاقي ..
الزومة في الستين طلعت عروس النيل بالقرمصيص مارقي
...زي القمر باقي ...دافري الصفوف شاقي
..ليها الكفوف داقي ...ساقت الفرح سايقي
...زغرودة فوق لا فوق ضاربي السمي وطاقي ...

يي دة الدباس قوقة ... ينقر دليبة رزم
جابو الطنابرة نغم ..يا الزومة غيرك لع .. يا الزومة ليكي نعم
ما وصفوك عوقة ... لا قالوا ممحوقة ... لا قالوا مطلوقه
يا الزومة دغريي .. طاهري وشريفيي .. يا قهوة بكريي
حاكمي المزاج والكيف .. عازمي وتكرمي الضيف ..يا درة فوق النيل .. زي ماركة أصليي
الزومة معشوقه .. وفي غاية الروقه .. عشاقه مشروقه
بي حسنها وذوقه .. وزيا" سمح فوقه
واحبابا متصابقي ... وجات خابي مندلقي
السمحي يوت عايشي .. متسامحي متعايشي
شايقيته وعربه .. بي زنجها وحلبه
بي حلمها وادبه ... هبدت لهيب غضبه
الزومة بت وطنه .. عربيها زي رطنه
حضنت ولاد بطنه .. سوداني سوداني
الكلو سوداني وما فيهو براني

دق الكفر .. زومة
دق الوتر .. زومة
عطر الزهر .. زومة
وصدق الخبر .. زومة
وحلو السمر .. زومة
وعينة المطر .. زومة
وزينة البشر .. زومة
وموية النهر .. زومة
وزرع المتر .. زومة
وتربات بطر .. زومة
وسر الصلاح .. زومة
وطب الجراح .. زومة
وغاية النجاح .. زومة
وآية الفلاح .. زومة
سمح السماح .. زومة
وطيبة الخصال .. زومة
وسحر الجمال .. زومة
وسيف النضال .. زومة

الناسه وناسه ... وين اللي زي ناسه .. في ذوقه وإحساسه
سي فوق سراحينا بازه وخماسينا ..ودار شيخنا علي حامد .. ولاا شيخنا بن إدريس وخلوة ولاد درويش
حمدابا والننقاب .. فوجابا والنيداب
رحمابا والتجماب .. عراما والعوناب
عمرابا والهاتفاب .. لمت دراويشا .. وهمت جراكيكا
أنوار مضوابا .. واسرار منابيرا .. وحلة وهاهيبا
وطلت حليبابا .. ونضرت غباشابا .. وحضرة قويضابا
وتلقى السكارنة هناك .. وسوق الكراكرة معاك .. وروح عسالينا
وعرج من الزاكياب .. لي خور شمارابا .. وخور مهدي عندو تقيف جم تومو ود الريف .. وخور الخليفة أبقيف ..ويا نيم نمر خدر .. حيشان علي الكرار .. وبيت الدمامة يجيك ..ودرب الترك ماشي .. ودرب الجمل غاشي .. مندلي منحدر
ودومة النوابي ام ضل .. ضل مو هجير وبقل
هاك قولي من خافقي ..يا الزومة في الستين منبسطي متمهلي ..فوق مجدك اﻷصلي ..أنا ما غريب عنك ..أنا فيكي بين أهلي ..أصلي وتمام فصلي ..متن عرى وصلي ..يا الزومة في وسطك بحريكي أو قبلي ..يا الحلوي كل مالك في عيني يوت تحلي ..أمي الرؤوم إنتي لا بتجفي لا بتسلي ..وطعم الشمال غيرك يا الزومة بنجقلي ..بنجقلي ..بنجقلي ..