ادب الاخوانيات بين شعراء الشايقية

 ادب الاخوانيات   بين شعراء الشايقية

أدب الإخوانيات ذلك الأدب الجميل الذي ولد من رحم الأدب العربي،. ولقد كانت كتابة الرسائل الديوانية والإخوانية في أوائل حكم بني العباس جارية على نظام كتابتها في أواخر عهد بني أمية، وقد برز فيها ابن المقفع والقاسم بن صبيح وعمارة بن حمزة ونظراؤهم وما يزيدها حسناً وبهاء مراعاتها لمقتضى الحال، وفي هذه الرسائل تظهر مشاعر الجانب الآخر، وتستلذ بمغازلة أحرف الشوق بين الأحباب تسفر عن مكنون الوداد وسرائر الفؤاد و , ادب الاخوانيات منتشر بين شعراء الشايقية بصورة عامة ومن اجمله تلك المساجلة التي حدثت بين الشاعرين (حسن الدابي وعبدالله محمد خير) حين كتب الشاعر عبد الله محمد خير القصيده التالية مخاطباً الشاعر حسن الدابي يخبره بمافعلته الباخرة (الجلا) والجلاء كانت من اجمل البواخر النيلة العاملة في الشمالية (الجلاء وعطارد وكربكان والزهرة) 

ودالدابى مالك ساكت ما شفت ( الجلا ) السواها 
شال محبوبتى سافر بيها كيفن عاد بعيش لولاها 
بابور البحر مو عارفى شايل اعز زول جواها 
ماهماها حالى ألبى ما دام نوره وضواها 
تشتكى بالعلي عيونى أهمله ما سمع شكواها 
اللحكيلك ألماك عارفو كيف مسخت بلدنا ورآها 
كان كاتمه الشجن في وداعه ال دموعه مو ساتراها 
وأيه فايدة حياتى البعده آخوى أتقلب مجراها 
تقصر او تطول ايامى دى إنا لأمن أموت بطراها 
من يومة رحيله السمحه خلت فى العيون ذكراها 
خلت فى القليب بصماته أحرف كل يوم بقراها 
***************************
ما بتحمل حبيبتى الغربه لا له وحاته مو قادراها 
وكيف حاله إن مشت فى بلدا حاره وناسا مو شاكراها
كان فات المحطات جمله يا حسن القرير بقشاها 
قوم يوم التلاتاء أندله بى تالا الرصيف تلقاها 
ما تعاين كتير وتشبه ديك إياها ديك مو ياها 
باينه حبيبتى من بسماته والنور يضوى من محياها
*************************
يا حسن أنت فوق أوصافه جيب أبيات وقول معناها
واوعك ترتبك فى وداعه ذى ما نحن ودعناها 
واكتب لى جواب طمنى لا يبقى السفر أعياها 
ما بتقدر عليها الدرجه إلا غلب عليها حياها 
هاك منى الرسالة التالته وعينى بالدموع راوياها 
تلقاك حافظى للبيناتنه وتبقى العشره مو نا سياها 
إن كنت ما بخاف عزالى آزول كت بقوم ابرأها 
لكين بخشى قلنا وقالو وحالى السمحه عارفه براها

 فيرد عليه الشاعر حسن الدابي بالقصيده التالية يصف المعاناة من تلك الباخرة ويدعو الله ان يعيقه 

صحيح ياعبدو أخوى قولك حقيقه
كتير الطفشه ( الجلا ) من فريقه
يزازى نقل سميحات الخليقه
ورنين صفارتو نفسى أبت تطيقه
معاها انا كيفاسوى شنو الطريقه
تعيق فى الناس اله الناس يعيقه
إتمناله فى دالة غريقه
تحتل فيها ما تفضل شقيقه
تطير ريشاته منها بى فريقه
وصميم مكناته تلتهموالحريقه
قمرات نومه تسكن أم دريقه
وتولد فى عنابره عشان غريقه
بناتناحليل سروحن فى السبيقه
لقيط ام راس مبقعى و الكريقه
إديهن حلوه غير لبس أمدقيقه
وبدون كترت غويش نفسن طليقه
جمالن خلقه لو لفحن طريقه
وبدون مضغوطفراد باهى زيقه
يا حليل قتانن الفوق السليقه
ليقيمتو تطمن الضارباهوريقه
كتير قبلك يئن مضروب بديقه
تسد عبراتو تسمع لى شهيقه

(نواصل)

فاطمه بت ودخيري وهي من اهالي مقاشي كتب القصيده التاليه الى ابنها 

السلام رسلت السلام يغريك يالزين
السلام ليك وللمعاك فى الاوضة قاعدين
السلام من عين شمس لاحد فلسطين
عاد انا ما بوصفك آصباحى بخاف من العين
من الخلوق وداعاك جبرين
انت بالعافى التخصك فى المصارين
تبقالك هدم سروال ونعلين
دايرى اشكيلو العزر صمد النمرتين
وانت آسيد الجزيرى التكاكى وزين
ياسيد الشال تقيل فدع العراجين
وماترسل لى جوابا فيه سطرين
ومابتقول لى نعيم صباح أمو اشتغل وين
أنت ما عارف قليبا لى مجينين
وماك هارف جواب الخبر يجينى وازيد لى شبرين
انبسط لى انبساطى زايدى على القوانين
من قبل الملمات مانا فايقين
منطبقات على ثلاثة واثنين
وختى ربع جنيه وبعضا ثلاثين
وقالوا مابنقبل عزرقضونا فى الحين
أكان لى المقد ماجا بلو مدين
والعشريف مبوص مامرق هين
أصلوالاتمرا مرق ولانا سايقين
طلبتك بالله رسل لى جنهينسمع الشاعر الكبير المرحوم اسماعيل حسن ود( ود حد الزين ) بقصيدة بتد خير الي ابنها فكتب علي لسان ولد بتد خير لامه وحكي فيها عن الحال 

في درب البنات يا يمه أنا إبشتنته وإتبهدلته واتغربته دابي
وأنا إتوكرته في بلدن بناتها بلا المهور الجامحة فوق الريح تشابي
وجوهن يمه كان شفتي القمر لجلج يضاحك في الروابي
عيونن يمه زي بحر المحيط والموج يولول
والعرق لافحني فايت وا خرابي
سنيناتن بلا شخب الحليب الصافي يرهج في الكبابي 
وريقن يمه زي خمر التمور المن زمان طامرنو في جوف الخوابي
ورقابن يمه وين رقاب الريل ؟؟
علي الحدب البعيد شرفن علي هوهيو كلاب
وعودن يمه متل الخيزران فدعوهو لي وجعي وعذابي 
العرجون يصارع في السبيط مندلي........فوق قلب الجريد
هتان ينقط في العسل يا ريت شرابي
ولونن يمه زي لون القمح ضروهو وشوف ضراني كيف؟؟
الله بضاريك يا الضرضر صوابي!!
دريباتن ....عقاب التيه
ومافي خبير بشق التيه علي بلد الدوابي
مهرن غالي ما بقدر عليهن
وحاتك انت ما بقدر عليهن
وكمان شوفو المصيبه نفيستي فيهن
ومنو البقدر يمد ايديهو لي كيس المرابي
دحين يا يمه أنا راجع لدريبك وأنا الغرقان وفي الموجات بشابي
أصارع في الهلاك يا يمه قاسي
وبعد قربته لي قيفة الشرق
تلفحني شيمي كاسحي مغربابي
وأنا قعدته زي فاقدن مزوزو أجرجر في التراب ودر حجابي
مشاكل الدنيا مما فته منك وإلى هادا الوكت وايضاً كذلك إلى ما بعدو ضددي مبشتنابي
أنا لا مالاً لقيتوعشان أجيكي 
أقدل مع الجنيات تجيكي العافي بس فضل شبابي
وأن كان للقروش أن شاالله طايري
أنا معّلم الله ليّ حولين أسم فرطاقه ما دخلت جرابي
والخبر المهم ما قلتو ليك
قبل ما أنسى في اخر جوابي
دا شيتن أصلو مافكرته فيهو
وحاتك ضمه ما كان في حسابي
إرادة المولى موخافي عليكم 
وكان ديسته لابد يوم تجيكم
خبيري مع البنات والليل يهود
أهز ضرعاتي وأرفع في حجابي
أنا بقيت غنّاي العلع في البنادر
متل ناس ود صليليح.... طنبرابي
حينما سمعت الحاجه بت ودخيري برد اسماعيل حسن علي جوابها لابنها وهي التي طلبت من ابنها الجنييهن .لم يرضها القول وانها كانت تعاتب ابنها في طول الغياب قيل بانها ذهبت لاسماعيل حسن في منزله وقالة القصيده التاليه .
اسماعيل حسن بقلب شكورو
واسمعيل حسن ثابتات عقولوا
سال من بيتو قالو لي ساكن في قصوروا
دخلت البيت قلته كدي الازورو
عاد لقيت اب ذوق يولف في سطورو
قال ادخلي ا حا جي شوف السور ونورو
عاد انا الحرقاني السور كيف دخولو
اسماعيل انا الحاسبالو زي ولدي البدورو
واسماعيل انا الحاسبالو زي منعم في دورو
وما شفنا الزول عديل يصغر بي زولو
ويلبس ولدي توبا ماهو هولو
ويقول فرطاقه ما وفره لا حولو
وفي درب البنات خارش طنبورو
وهو عاد ناس ودصليليح ح شن ببقولو
عاد هو ولدي الظابط الصول بي دبورو
وكت معاي الاوريك دورو
هوبي بقرو الحمر ووسع مسورو
ويقرع في الفواكه اليوم لا طولو
هوقايم بي بغر ما سرحولو
وكت لروح مصر وطالن دهورو 
كلامي انا للجنيهين بالهظار ساكت بقولوا
عاد انا وقعلو بي ام حد ازين وبي جدو البزورو
يقلب الرد يوصلو بي اصولوالقصيده التالية للشاعر عبد الله محمد خير ارسلها لشاعر ارقي (تلب) وهي شبيه جداً بالقصيده الاولى (الجلا) فالشاعرين (عبدالله وتلب كلاهما يشكومن فراق المحبوب )في الاولى استنجد الشاعر عبدالله محمد خير بالشاعر الكبير حسن الدابي وفي القصيده التاليه استنجد الشاعر عبد الرحمن تلب بالشاعر عبد الله محمد خير ولكن رد عبدالله لم يرضي الشاعر حاتم حسن الدابي مماادى ذالك الى تدخل مجموعة من الشعراء في اجمل واروع معركة شعرية .

حبل الصبر
تلـب أمسـك حـبـل الصـبـر خـلـو قلـبـك لا يبـقـي نــي 
أصلـو ود أب زيـد كـل يـوم مـن بلـدنـا يـرحـل جــدي 
شــن بسويـلـك عــاد أنــا القبـلـك الحـرمـان مــر بــي 
والضنـا الهسـا عليـك زاد مـن زمـان أنــا زايــد عـلـي 
كـم حبيبـا شغـل الفـؤاد فـي العيـون كـان متـل الصبـي 
حـل بـي (توفيـق) السـواد مافـي زول قـال كفـاره لـي 
أرقــى يــا تـلـب ودعــت قـبـلـو كـــم قـمــره مـنــوره 
وكم تحف نـادرات سافـرن وكـم فراشـه وكـم جوهـره 
وكـم قلـوب متـلـك بالـفـراق الأنـيـن والـشـوق سـهـره 
شوف عوض عبدون الحروف خل مـن باطنـه ظاهـره 
يـا عـوض مدرسـة الشعـر بـي جــداره إيــاك نـاظـره 
بي غناك حرف السيـن بقـت فـوق بنـات جيلـه مبطـره 
سـابــك الـلــى بـلــد الجـلـيـد ودعـــك ودقّ مــغــادره 
يـا قـلـب مـالـك انـجـرح ولـسـه لـيـه جـرحـك مـابـره 
أمــا أنــا المسكـيـن الـطـروف غــرزت فــي أظـافـره 
ويـن غنـاي لـي شتـل الـجـروف والجنـايـن وأزاهــره 
أسألوا الدرويش عن صديق عمرو كم جمرات عاصره 
خـلـو يحكيلـكـم عــن حـيـاه النجيـفـى الـهـو معـاصـره 
الككـر يـا رحمـن زمـان ضـاع مــع العـشـاق شـاعـره 
مانـفـع تغـريـدو الحـزيـن مــا نـفـع صـــدق مـشـاعـره 
جنـنـو (البتوفـيـق) رحــل وهــام ورا الـقـام بالبـاخـره 
خــلا دنيـاهـو فرنـدقـس مـــا عـــرف أولـــه وآخـــره 
أرقـى يـا رحمـن فــي السـمـاح مـافـي بـلـداً بتجـاكـره 
الله مديـهـا سمـاحـه صــاح مــن كـروهـا ولــى تـكـره 
أصلـو ود أب زيـد معتـرف بـي جريمتـو ومـو نـاكـره 
كـلـو جــور الـقـال سفـروهـا وقـطـع لـيـهـا تـذاكــره. 
ويبدو ان القصيده لم ترضي الشاعر الكبير حاتم حسن الدابي خاصة الابيات التالية
أرقـى يـا رحمـن فــي السـمـاح مـافـي بـلـداً بتجـاكـره 
الله مديـهـا سمـاحـه صــاح مــن كـروهـا ولــى تـكـره 
بعد اندلاع الشرارة التي انطلق منها هذا الابداع الهائل في احظة تجلي و دون قصد من الاستاذ عبدالله محمد خير كتب الشاعر حاتم حسن الدابي رداً علي تلك القصيدة قائلاً 

عبدو كان طاوعت الحروف
رتب الكلمات و اوزنة
انت ياكا استاذ الشعر
والشمال بيك نأمنة
قولك الموزون الرين
كل خلق الله مجننة
بيهو صديق احمد صدق
الحجار صخرة يلينة
الا يا عبدو سمع كلام 
جاتني تلهجبو الالسنة
وقلت في ارقي جمال فريد
مافي بلداً بتقارنة
بيك ود الدابي ان سمع تبقي مشكلتك مزمنة
ولا تصل لي حُمد سعيد
والسرير الماهم هنا
القرير جوهرة الشمال
وانت دايريها محاسنة
وفي المقام زي زات العماد
هيبتة وعزة ساكنة
خضرته الزينت الضفاف
زي عيون ظبية علي سنة
مرتعه الريان الخصيب
القلوب كلها يرهنة
ويبدو ان سهم الشاعر حاتم حسن الدابي اصاب الجميع فانطلقت الشياطين الشعر عليه من كل صوب
فالرد لم يعجب شاعر تنقسي االمهندس علي الخضر احمد فكتب يدافع عن الشاعر عبدالله محمد خير ويرد على حاتم بالقصيده التالية
عبدو عندو خيال للحروف قبل ماتتقال يوزنة

وفي اللسان لحنها ينطبع مابيتوة البيلحنة

حت ساس الغنا من زمان بي رصين القافية وبني

وبعدو جات شعراء الشمال تبني فوق حد ساسو البنا

قولو في التوفيق كان حروف تحكي عن لحظات محزنة

وعن هيام القلب الصبح بين لهيب الشوق والضني

وقصدو كان لوعات الفراق بي لسان الحال يعلنة

سلوي في الايام لي قليباً عاش متيم فاقد هنا

ماحصل سباها القرير حتي في اشعارو وغنا

ومانطق لو كان بالمزاح هانة بي كلمة محاسنة

قلت جوهرة ضاوية الشمال زي عيون ظبية علي سنة

وطاف خيالك يصف الجمال قلت صدر النيل حاضنة

كيف حكمت عليهو الشمال حتي جوهرتو تعينة

وفي الحكم تنحاز للقرير ولأ شان إياك ساكنة

اصلو عند الناس مهما كان طال شقاها وزادت عنا

ورغم كل قساوة الظروف يبقي غالي عزيز موطنة

ياما كم من قري في الشمال تسحر الالباب فاتنة

وتستبيح حرمات الجمال لي عقول الناس تسجنة

طوفو لي حد حلفا وتعال لو يدوم ترحالك سنة

تلقي تنقسي بهجة وجمال مابيحيطو حروف الغنا

تعرف انها ذات العماد الوصف خضرته ربنا

وبيها وصي النيل من قديم بي حنانو النيل حاضنة

وعبدو مابيهددو بالسرير ومابتكون مشكلة مزمنة

للخلق شيطان الحروف يمشي بي تصريح مننا 

نحن يانا منابع الحروف ومن زمان يانا اهل الغنا

وورثة الكلمات جيل في جيل لانهاية الكون عندنا

حقو للاسناذ كان يكون الكلام بي زوق واعتني

والادب سلطان الحديث يحكم الفنان من جني

لو مشيت قدامو اعتزر ننسي للمشكلة ندفنة

ولو كمان طاوعت الخيال يبقي حد مشوارك دنا
(نواصل)رد الشاعر / علي خضر على حاتم حسن الدابي لم يعجب شاعر القرير احمد محمد الحسن فرد بقصيدة يقول فيها :للشاعر علي خضر

تانى عاد دار تكتب شنو بعد ثلاثة دواوين شعر 
كلهن ما فيهن كلام يوحى بالالهام والفكر 
ومافى شى غير ورقة وغلاف وصورة ماخدة ملامح الجقر 
فيهن الاحساس بارد شديد عشرة درجات تحت الصفر 
يا خسارة الورق اللى ضاع وضيف عليهو خسارة الحبر 
حتى لى حاتم وصل والقرير والشاعر السر


[="arial black"]رد /الشاعر على الخضرعلى الشاعر احمد محمد الحسن بقصيدة يقول فيها :[/]

قلنا نار الفتنة انطفت تانى جيت دايرة تستعر 
وجيت كمان ماسكلك درب قاسى ما بيتجارى ووعر 
الكلام شتتو شتيت بان حقد مكتوم منستر 
والحروف لويته لوى خات الكلمات تتنكر 
جات ركيكة وفاقدة مضمون يسمعه اللى ذوق يفتقر 
لا نغم لا بيطرب حواس غير شتيمة والفاظاً قزر 
كان تخلى لسانك عفيف شان تخاطب الذوق والفكر 
وتنتقى الكلمات الفصاح حتى داب ترتاد الشعر 
انت قصدك دايرنى ارد شان يكون لك سيرة وذكر 
حتى لو بالخير واللا شر المهم الناس تنذكر 
كان دا ممكن لو جيت عديل فوق خطاوى الزول الخضر 
كنت اقولك شعراً افتخار وما قصدت انا يوم افتخر 
شعرى ينبع فيضا يسيل يطفى هم الراى الكتر 
ماهو نوع الشعر الرخيص لا يعجب الناس لا سعر 
فى البيسوى وما بيسوى يتقال ما مهم ربحان او خسر 
المهم ترقص الحروف بالغصب ومرات تتبخر 
يبقى بخت الناس الطرش واليقيف مجنون او سكر 
الا عاد ما دام جيت براك ودون تحس ذليت وعتر 
استعد لا تجر لا وراك او تفكر يوم تعتذر 
شان منابع الغنا مننا فوق خلايق الله بتنهمر 
لينا فى الاشعار ساس عميق مافى يوم يتقاس بالمتر 
وفى بحرنا ان داير تعوم تلحق القبالك ودر 
قلت ود الدابى معروف الامين العارف الخضر 
قصدك انو ابوى مجهول وسيرتو باقى سر 
يكفى انو ابوى معروف بى شى غير الغنا والشعر 
يعنى نحن حوينا اوصاف الشعر بينهم يتذكر 
يعرفوه الناس ويفرزو الفضة من التبر 
الا ما اتأنيت ما سأل اندفعت ابيت تنتظر 
وليهو فى الاشعار باع طويل وشعرو فى البلدان منتشر 
بى غناهو وشعرو الرصين سارت الركبان لا مصر 
بكتب الاشعار للعرف شعرى يرفع قيمة الحبر 
صحبة الصياد للكلب يقبله الصياد منجبر 
ماهو خوة وإلفاً شديد خلى عاد البينهم عمر 
ما بيفيد معرفتك لبيب بل دا باب معرفتاً مضر 
واليقول يوم يعرفك يبقى خل مقامو وصغر 
كل زول بالفيهو معروف ما بيخلطو الذم بالشكر 
وفى السباع العز بالضباع الكديس والليث والنمر 
قلت بى تأهيلى افتخر وانت فى تعليمى احتر 
شان قيرت سيرتى انا فى الكتاب انعدمت وراسك خمر
العلم ما قريتو افتخار بل ذخيرة وبيهو استجر 
الكلام يا احمد كتيييير يترى كل ما اقول اختصر 
القى جواى فاض وسال وفى اللسان القول مستمر 
كا ما اقول اغفر لك خطاك رغم انو هى ما بتتغفر 
الصفا البيناتنا كان ود من اساسو اتهز وعكر 
وشان لسانى عفيف ليك شفع هو زى العشا والشفع 
ورغم لنو يكلف كتير لا عندنا عادة وسبر 
نواصل مع رائعة الشاعر تلب التي فجرت ينابيع شعر الاخوانيات ونورد في مايلي رد الشاعر عبد الله محمد خير للشاعر حاتم حسن الدابي

حاتم أمسك حبل الصبر


الأستاذ عبدالله محمد خير


حاتم امسك حبل الصبر ونزهه أشعارك عن غرض 
وأقبل التوجيه ولو مر مالعلاج دايما فى القرض
خلى حسن النية موفور عندك اليبقى على مضض
وأعرف الصالح من الضار حت بعداك خربش أو عض
**********
عندك الإبدع ياسلام قام مفرهد يادبو غض
لاتعلمو شين الكلام شان تعافيهو من المرض
خلو يسرح زين فى الوطن ويا محمد ومسكين عوض
وخلنا النمشيبو قدام فن بلدنا وكت قام نهض
*********
إنت مالك ومال القرير وأرقى والدتى ومال حرض
ومالك إت ومال ذات العماد البقت فى جوف الأرض
أنت فنان يهب الجميع الفرح بالطول والعرض
ويثرى قيم الخير والصلاح فى الشباب قبال تنقرض
********
ياخى مالك و مال الولاد والبنات هم عارفين بعض
لاتقول لى واحد تكفر ولا للتانى إنت قض
خلى شعرك نوبة نعاس للمساهر الليل ماغمض
وحقو للإلفة يكون أساس على الأقل أو كان يفترض

شن جنيت هسع من قصايدك دى غير الصد والرفض

حاتم آخوى حب القرير ماهو( سنة)علينا إتفرض
وأى موهوب يهوى القرير صوتو كان علا كان إنخفض
وكل ما شدى بإسم القرير شادى تلقى طرب وإنتفض
وأى زول قالولو القرير قى الشمال جوهر ما إعترض
***********
عفوا الأستاذ القدير حاشا لى عهدك مانقض
منك أتقن نظم القريض ولى نواصى الأوزان قبض
وين شيوخ الشعر الكبار مالو سامرن إنفض فض
وإن بقى الحال ياهو ده الحال يبقى منو وعليهو العوض09-14-2010, 08:52 AM

قصيدة حاتم أمسك حبل الصبر الأستاذ عبدالله محمد خير يبدو انها لم ترضي الشاعر حاتم حسن الدابي لذلك رد عليها بقصيدة (عبدو صبرك ليه مالو عيل) ويقال ان الراحل المرحوم عبدالله محمدخيرأستأذن حاتم حسن الدابى فى قصيدة (عبدو صبرك ليه مالو عيل ) لانزالها فى ديوانه الجديد رغم معارضة حاتم بأن القصيدة كانت هفوة من هفواته ولايجب ان تنشر إلا أن الراحل اصر ووافق حاتم على طلبه وبعد هذه القصيدة لم يرد الاستاذ عبدالله محمدخير إلا أن بعض الذين اغضبتهم قصيدة حاتم فى حق استاذهم وشاعرهم المرحوم عبدالله محمد خير أصروا بالرد علي حاتم بقصائد مقتضبة سنوردها جملة واحده ونختم بقصيدة الشاعر علاء ابسير (نحن ياحاتم بينا ذوق ومن زمان لامانا الفة )

عبدو صبرك ليه مالو عيل
الأستاذ حاتم حسنالدابى

عبدو صبرك ليه مالو عيل كت منو على الناستشر
بى كرم وزعت الحبال عندك إنت بدت فى القصر
بيها ياسر قبلى إندرج لفلفن وقنب فوق جمر
وقبلى تلب بيها إتحزم زايدى فوق الكرعين تجر
مالولو خليتلك متر للزمان يبقالك دخر
عيب حبال صبرك تنعدم كل زول مدى حبل صبر
عندى حسن النية موفور لاخداع فيهو ولا مكر
ومانى شافعا بيخوفو بالسحاحير وزمر زمر
اقبل التوجية يا لبيب يالنظمت قوافيك در
انت ياكا محيط الكلام ونحن في وديانك نكر
مرة تسقيني عسل كلام باللسان تزرف في الشكر
ومرة تقلبو حظاً مزيج بالدموم من نفس الشطر
عبدو تلميزك مابلوم حضرتك والتوجية يسر
بسألك لو تسمح تقول الغلط ضما يات سطر
القرض شربتو للعلاج ضارة للمصران صح تضر
ونحن نستعملو للدباغ والمريض مابيشعربو مر
لو بديت خريش يالبيب عندى ليها مخالب صقر
أمالوعضيت لى زعاف مالقى الترياق منو كر
يسرى فى جوف المعتدين كان فقير كان ساكن قصر
ويلحق الينبح فى الرياض ويشملن أرقى مع الككر
ظنى فيك كان تهدى الشباب وبى حروف تبقالن بدر
يستنير بها طول الطريق ويتعظبها طول العمر
يمشو فوق عادات الجدود اولا من تقليد الكفر
ماتقول هم فاهمين بعض وكل زول فى أفعالو حر
أنت قصدك تخلق فتن بين ولاد شايق وبين بدر
نضجا لافكار والفعال ودبجن بى توب الستر
ولاتكون داعية إنحلال لى نفوس تحتاج الطهر
تخيت القرعة مع القحف وتخلط اليصلح باليضر
أما مالى و مال القرير فيها صح بقى نضمك كتر
بإختصار يا ذلة لسان يا كمان مساك الكبر
القرير سامرو إنفض كيف وأنت فى نمو زمن تجر
قلت للاتنين المعاك جيت طالب الدابي العزر
ياحليلا قصايدك زمان الجلا ويازينة العمر
يالسرير ويا حمد سعيد جمبكم مابسوى الضفر
أنتو ليه صمتو عن الكلام وفوقنا هالى شهور الفطر
حاشا مابيقلبنى الكلام وشاردى بى فوقى انا مابتمر
والتطير يلقوها الصباح ميتى فوق روسين التمر
لليجيك بى شر يالقرير سالى سيف العز والنصر
وفوق رقبتى أن دينك كتير لابدور حسنى ولا اجر